Ἑλληνική Transliterate

Português

Ἀετὸς καὶ ἀλώπηξ φιλίαν πρὸς ἀλλήλους ποιησάμενοι πλησίον ἑαυτῶν οἰκεῖν διέγνωσαν , βεβαίωσιν φιλίας τὴν συνήθειαν ποιούμενοι . Καὶ δὴ ὁ μὲν ἀναβὰς ἐπί τι περίμηκες δένδρον ἐνεττοποιήσατο • ἡ δὲ εἰσελθοῦσα εἰς τὸν ὑποκείμενον θάμον ἔτεκεν . Ἐξελθούσης δὲ αὐτῆς ποτε ἐπὶ νομήν , ὁ ἀετός , ἀπορῶν τροφῆς , καταπτὰς εἰς τὸν θάμον καὶ τὰ γεννήματα ἀναρπάσας , μετὰ τῶν ἑαυτοῦ νεοττῶν κατεθοινήσατο . Ἡ δὲ ἀλώπηξ ἐπανελθοῦσα , ὡς ἔγνω τὸ πραχθέν , οὐ 〈 τοσοῦτον 〉 ἐπὶ τῷ τῶν νεοττῶν θανάτῳ ἐλυπήθη ὅσον ἐπὶ τῇ ἀμύνῃ • χερσαία γὰρ οὖσα πετεινὸν διώκειν ἐδυνάτει . Διόπερ πόρρωθεν στᾶσα , ὃ μόνον τοῖς ἀδυνάτοις καὶ ἀσθενέσιν ὑπολείπεται , τῷ ἐχθρῷ κατηρᾶτο . Συνέβη δ ' αὐτῷ τῆς εἰς τὴν φιλίαν ἀσεβείας οὐκ εἰς μακρὰν δίκην ὑποσχεῖν • θυόντων γάρ τινων αἶγα ἐπ ' ἀγροῦ , καταπτὰς ἀπὸ τοῦ βωμοῦ σπλάγχνον ἔμπυρον ἀνήνεγκεν • οὗ κομισθέντος ἐπὶ τὴν καλιἀν , σφοδρὸς ἐμπεσὼν ἄνεμος ἐκ λεπτοῦ καὶ παλαίου κάρφους λαμπρὰν φλόγα ἀνῆψε . Καὶ διὰ τοῦτο καταφλεχθέντες οἱ νεοττοὶ ( καὶ γὰρ ἦσαν ἔτι ἀτελεῖς οἱ πτηνοί ) ἐπὶ τὴν γῆν κατέπεσον . Καὶ ἡ ἀλώπηξ προσδραμοῦσα ἐν ὄψει τοῦ ἀετοῦ πάντας αὐτοὺς κατέφαγεν .
Ὁ λόγος δηλοῖ ὅτι οἱ φιλίαν παρασπονδοῦντες , κἂν τὴν τῶν ἠδικημένων ἐκφύγωσι κόλασιν δι ' ἀσθένειαν , ἀλλ ' οὖν γε τὴν ἐκ θεοῦ τιμωρίαν οὐ διακρούονται .