Ἑλληνική Transliterate

English

ΕΥΡΙΠΙΔΗΣ
ἔα , τίν᾿ ὄχθον τόνδ᾿ ὁρῶ καὶ παρθένον
θεαῖς ὁμοίαν ναῦν ὅπως ὡρμισμένην ;

ΚΗΔΕΣΤΗΣ
ὦ ξένε , κατοίκτιρόν με , τὴν παναθλίαν ·
λῦσόν με δεσμῶν .

ΤΟΞΟΤΗΣ
οὐκὶ μὴ λαλῆσι σύ .
κατάρατο , τολμᾷς ἀποτανουμένη λαλεῖς ;

ΕΥΡΙΠΙΔΗΣ
ὦ παρθέν᾿ , οἰκτίρω σε κρεμαμένην ὁρῶν .

ΤΟΞΟΤΗΣ
οὐ παρτέν᾿ ἐστίν , ἀλλ᾿ ἀμαρτωλὴ γέρων
καὶ κλέπτο καὶ πανοῦργο .

ΕΥΡΙΠΙΔΗΣ
ληρεῖς , ὦ Σκύθα .
αὕτη γάρ ἐστιν Ἀνδρομέδα , παῖς Κηφέως .

ΤΟΞΟΤΗΣ
σκέψαι τὸ σῦκο · μή τι μικκὸν παίνεται ;

ΕΥΡΙΠΙΔΗΣ
φέρε δεῦρό μοι τὴν χεῖρ᾿ , ἵν᾿ ἅψωμαι κόρης .
φέρε , Σκύθ᾿ · ἀνθρώποισι γὰρ νοσήματα
ἅπασίν ἐστιν · ἐμὲ δὲ καὐτὸν τῆς κόρης
ταύτης ἔρως εἵληφεν .

ΤΟΞΟΤΗΣ
οὐ ζηλῶσί σε .
ἀτὰρ εἰ τὸ πρωκτὸ δεῦρο περιεστραμμένον ,
οὐκ ἐπτόνησά σ᾿ αὐτὸ πυγίζεις ἄγων .

ΕΥΡΙΠΙΔΗΣ
τί δ᾿ οὐκ ἐᾷς λύσαντά μ᾿ αὐτήν , ὦ Σκύθα ,
πεσεῖν ἐς εὐνὴν καὶ γαμήλιον λέχος ;

ΤΟΞΟΤΗΣ
εἰ σπόδρ᾿ ἐπιτυμεῖς τὴ γέροντο πυγίσο ,
τὴ σανίδο τρήσας ἐξόπιστο πρώκτισον .

ΕΥΡΙΠΙΔΗΣ
μὰ Δί᾿ , ἀλλὰ λύσω δεσμά .

ΤΟΞΟΤΗΣ
μαστιγῶσ᾿ ἄρα .

ΕΥΡΙΠΙΔΗΣ
καὶ μὴν ποιήσω τοῦτο .